Detaje tronditëse vijonë të dalin në dritë mbi vrasjen e 24-vjeçares palestineze Ryyan Alwan nga babai i saj 49-vjeçari Fadi Alwan.
Ditën e djeshme u raportua se shkaku që mund të fshihet pas kësaj vrasje makabër është çështja e nderit, ndërsa tashmë është bërë me dije se Rayyan Alwan ka qenë në presion të vazhdueshëm për shkak të një video nudo që qarkullonte në persona të ndryshëm në vendin e saj të qëndrimit.
Ky fakt është bërë me dije nga dëshmia që e ëma e 24-vjeçares ka dhënë në polici pas një kallëzimi të bërë më datë 25 shkurt, 1 ditë përpara se vajza e saj të gjendet e vdekur në apartamentin në Tiranë.
Mamaja e 24-vjeçares ka kallëzuar në polici një rast zhvatje në Gjermani për shkak të një video intime të vajzës së saj. Ajo ka rrëfyer se Rayyan Alwan i ka marrë disa herë para mamasë së saj për të paguar shantazhuesit që kishin në dorë videon e 24-vjeçares, e cila më pas ia kishte dërguar personave që e kërcënonin nëpërmjet transferave.
Ndër të tjera mamaja e 24-vjeçares hedh dyshimet se pas këtyre shantazhuesëve mund të fshihej dhe vetë vajza e saj, Rayyan Alwan.
Ndërkohë nga përgjigja që autoritetet shqiptare morën nga ato gjermane, rezultoi se Rayyan Alwan në janar të vitit të kaluar kishte denoncuar në polici babain e saj për ushtrim dhune. Rayyan Alwan kishte konflikte të vazhdueshme me nënën, babain dhe vëllezërit e saj pasi ata pretendonin se ajo nuk ishte e përkushtuar ndaj fesë aq sa ata mendonin.
Ndërkohë, mësohet se Rayyan ishte divorcuar dhe kishte 3 fëmijë nga martesa e parë, gjë e cila ishte në kundërshtim me parimet e babait të saj.
Fillimisht u tha se Fadi dhe Rayyan ishin partnerë, por më pas u zbulua se në të vërtetë ata ishin baba dhe bijë.
Sipas asaj që është shkruar në fashikujt e dosjes, bazuar në pamjet e kamerave të sigurisë, 49-vjeçari më datën 22 shkurt 2025 është larguar nga banesa e marrë me qira në Tiranë në orën 05:23 dhe në duar mbante dy qese plastike.
Në orën 09:50 ai ka udhëtuar nga Aeroporti Ndërkombëtar “Nënë Tereza” dhe në orën 12:05 ka mbërritur në aeroportin “Eleftherios Venizelos” në Athinë, Greqi.
Dhe po në këtë datë ka udhëtuar drejt Amsterdamit, Holandë. Po këtu, kanë humbur edhe gjurmët e Fadi Alwan i cili është tashmë i dyshuari kryesor për vrasjen e 24-vjeçares palestineze në Tiranë, Rayyan Alwan.
Gjithashtu, mësohet se 49-vjeçari pavarësisht se është shtetas palestinez dhe jeton në Gjermani, mbante dokumente greke si edhe pasaportë të shtetit të Kosovës.
Ndërkohë, një tjetër detaj tronditës u bë me dije më herët lidhur me këtë ngjarje. Sipas asaj që mediat e huaja shkruanin, dyshohet se 24-vjeçarja palestineze Rayyan Alëan përpara se të vritej është përdhunuar nga babai i saj Fadi Alwan.
