Inside Story ka takuar njerëz që njohin nga afër historinë, ka kërkuar informacione në institucionet shqiptare dhe ato keniane, ka konsultuar dokumente zyrtare dhe informacione kofidenciale.
I vetmi fakt i sigurt në këtë histori është se Joyce ka pësuar shumë trauma, ka lënguar derisa humbi jetën ndërsa drejtësia shqiptare vijon ende të ngrejë duart lart.
Problemet për Xhoin nisën dhjetë ditë para ngjarjes kur ajo vendosi të ndërronte edhe rezidencën e banimit. Më herët vajza jetonte në lagjjen “Ali Demi”. Në momentin e incidentit të 13 gushtit ajo gjendej në Flauer Residence.
Pas disa hezitimeve, Inside Story komunikoi me nënën e Joyce për të hedhur më shumë dritë mbi ngjarjen përmes informacioneve që Znj Ruth Abongo disponon. Ajo tregohet e rezervuar lidhur me informaiconet konfidenciale, por shpreh me bindje pistat dhe njerëzit që i duken të dyshimtë në gjithë këtë histori.
“Nuk do të qaj çdo ditë. Lotët do të mbarojnë shpejt. Unë do të kërkoj drejtësi derisa të jem gjallë. Edhe pse policia nuk e do të vërtetën, ajo është tek telefoni I Joyt. Ata e kanë përgjigjen deri para orës 4 pasdite të datës 14 gusht 2022. Xhoi kishte vetëm një telefon” u shpreh Ruth Abongo, mamaja e Xhoit.
Gjatë intervistës për Inside Story, në një moment zonja Ruth Abongo dyshon nëse rrëfimi i saj është i përshtatshëm për tu bërë publik, por ajo ka një qëllim: drejtësinë për të bijën. Sot, prokuroria po e heton ngjarjen në dy drejtime: si vetëvrasje por edhe si vrasje.
Nëna e saj shprehet e bindur në këtë të dytën. Këtu, situata komplikohet. Dyshimet janë mes disa pistave të ndryshme. Krim pasioni, vrasje për të mbuluar një abuzim seksual nga njerëz me pushtet, apo probleme në punën si krupiere.
“Ekziston pista e vetvrasjes, por nuk është e mbështetur në fakte” u shpreh gazetarja Anila Hoxha.
“Duhen ngritur disa pista dhe mungesa e informacioneve i rrëzon vetë një e nga një. Është e gabuar të ngresh vetëm një pistë” u shpreh Artan Rexhepi, ekspert i kriminalistikës.
“Jo nuk është vetëvrarë. Nëse shikohet pozicioni kur është gjetur nga fotot e policisë duket që nuk është vetëvrarë. Ky burrë vijon të ecë i lirë dhe ka vrarë vajzën time, Nëse policia do, ata mund ta gjejnë. Pse nuk akuzohet dikush tjetër” u shpreh Ruth Abongo, mamaja e Xhoit.
Nëna e Xhoit zbulon se Emily shkon të jetojë me Xhoin te Flauer rezidencë vetëm 5 ditë përpara se ngjarja të ndodhte.
Çuditërisht, menjëherë pas incidentit, Emily kthehet te banesa e parë në zonën e Ali Demit dhe nuk vjen më tek Flouer Residence.
Veprimet e para hetimore, Policia e Shtetit, do ti kryente më 15 gusht 2022. Dy ditë pas ngjarjes. Kohë kur edhe ka dërguar materialin për vlerësim në prokurorinë e Tiranës. Policia nuk e raportoi ngjarjen. Ajo u bë publike pas 3 muajsh.
“Jemi në Shqipëri. Fërkohen dy makina, del çarçaf deklaratë, ka vdekur një njeri informacioni i hermetizuar. Gjërat që mbahen në terr, krijojnë probleme” u shpreh eksperti i kriminalistikës, Artan Rexhepi.
“E kanë përgjigjen deri para orës 16:00”, a duan ta mbyllin rastin e Xhoit si vetëvrasje?
Nëna e Joyt gjatë dëshmisë së saj ka treguar se Xhoi kur nuk ishte në punë, dilte me shoqërinë. Katër ditë para ngjarjes ajo ishte në Durrës me mikun e saj Rodi Barci.
I cili ishte edhe një nga shoferët e kazinosë ku Xhoi punonte. Ato ditë kishte qenë edhe në Jug të vendit, ku mendohet se dikush kishte abuzuar seksualisht me të.
Xhoi ishte shumë aktive në rrjetet sociale. Edhe udhëtimin në Durrës ajo e kishte publikuar në Tik Tok.
Në këtë ngjarje të mbushur me mister ata që pretendohet se mund të kenë dijeni për ngjarjen janë Emily Mutua, Xhoi Brenda që është shoqja e ngushtë e Joit, Rodi Barçi shoferi dhe një personazh tjetër, biznesmen në moshë të mesme i paidentifikuar publikisht deri më tani.
“Shoferi në Durrës nuk ishte treguar i mirë me të. I kishte qëndruar shumë afër. Ishte shumë protektiv dhe ekspresiv sikur të ishin në një marrëdhënie. Xhoi i kishte thënë pse sillesh në këtë mënyrë sikur të ishe i dashuri im? Ai i kishte thënë që unë dua të jem. Por Xhoi nuk kishte pranuar. Më parë shoferi i kishte kërkuar Xhoit marrëdhënie romantike, por ajo kishte refuzuar. Ai e kishte ndjekur për dy javë. Kur Xhoi e kishte vënë re i kërkoi të përgjigjej pse po vepronte në këtë mënyrë. Do të të raportoj në kompani I kishte thënë. Më pas shoferi i tha nuk të shqetësoj më. Mos ki merak. Mos më raporto thjesht doja të dija pse më refuzon dhe po të ndiqja për të kuptuar nëse po të pengon dikush.” u shpreh mamaja e Xhoit, Ruth Abongo.
Nëna e Xhoit në lotë shpjegon gjatë intervistës me Inside Story se shoferi e përndiqte Xhoin prej javësh. Këmbëngulja e tij për të pasur një raport intim me të bijën, ka ngritur dyshime të fort ate nëna.
“Ai e përndiqte. Mbante një kapele dhe përndite Xhoin nga mbrapa me duar në xhepa. Ai fshihej se nuk donte që Xhoi ta kuptonte. Ajo i tha se nuk dua të kem marrëdhënie dashurie me ty se kam dikë tjetër” u shpreh Ruth Abongo, mamaja e Xhoit.
