Drejtësia vonon, por nuk harron. Aldor Nini u arrestua nga Policia e Tiranës teksa akuzohet për përndjekje dhe shantazh e dhunë në familje. Bosi i vetëshpallur si i paprekshëm, pa t’i viheshin prangat mu në qendër të Tiranës.
Aventura e pronarit të “Acromax media” mori fund ditën e djeshme. Kjo me akuzën për përndjekje të ish gruas së tij Anxhela Faber. Një person që ka ngritur biznesin e tij në bazë të shantazhit e ata që nuk kanë rënë pre, kanë vuajtur fundin më të dhimbshëm. I tillë është edhe rasti i Flori Mumajesit.
Autori, këngëtari dhe producenti i njohur ka qenë “viktimë” e sulmit të “Acromax media” me drejtues Aldor Ninin. Një nga emrat që ka shkruar emrin me të arta në historinë e muzikës shqiptare duke bërë për vete miliona vetë në vendin tonë, u sulmua nga një person që kishte zgjedhur të qëndronte pas tastieres përmes një kompanie fantazëm.
“4 vitet e fundit kam kaluar një horror, jam i vdekur për së gjalli!”, shkruante vitin e shkuar Flor Mumajesi duke lënë të nënkuptohej se fshirja e arkivit padyshim ishte një goditje e rëndë për të.
Ka qenë Aldor Nini njeriu që zgjodhi të sulmonte një nga artistët më të mirë të muzikës vetëm se pse ai nuk iu bind tarifave dhe faturave të tij të kripura. Kanali zyrtar në Youtube i “ThreeDots” nuk ekzistonte më.
Flor Mumajesi iu fut një historie të gjatë në drejtësinë gjermane që në fund Gjykata e Këlnit i dha të drejtë këngëtarit tonë. Ai tregoi se çfarë kishin vendosur togat e zeza që e detyronin Ninin bashkë me Faber që të mos shfrytëzonin dhe përdornin veprat e Mumajesit. E gjithë kjo ndodhi në vitin 2014-të, kohë kur Flori vendosi që mos të ishte më pjesë e kompnaisë së Aldor Ninit.
Çfarë deklaronte asokohe Flor Mumajesi:
“Kam heshtur gjatë, sepse nuk më pëlqen të flas kuturu. Edhe kur është shpifur për mua, nuk kam thënë asgjë… Pasi prisja këtë moment dhe në këtë moment dua të them pikërisht këtë:
E kam thënë dhe në një deklaratë të mëparshme, që askush nuk duhej të përfshihej në një situatë të cilën do ta ndiqja ligjërisht. Në respekt të asaj deklarate kam qendruar i heshtur gjithë këtë kohë, në lidhje me diçka e cila më ka shqetësuar shumë, dhe më besoni, ka qenë shumë e veshtirë të rrija kaq i qetë… I heshtur, por sigurisht, i vendosur kam ndjekur të gjithë rrugët ligjore për të kërkuar diçka e cila është e patjetërsueshme…është e drejta ime.
Ashtu si çdo muzikant, tekstshkrues, interpretues, performues dhe autor, duhet ta mbroj këtë të drejtë pa kompromise, askush nuk mund ta vjedhë dhe askush nuk mund ta marrë me dhunë. Mbi këto parime themelore, në dukje kaq të thjeshta, por ndonjëherë shumë të komplikuara për t’i mbrojtur, zyra ligjore e cila më ka përfaqësuar ka arritur të marrë në dt. 25.03.2014 vendimin nga Gjykata e Këlnit në Gjermani. Në këtë vendim, gjykata është shprehur në favorin tim, duke vendosur:
- Ndalimin e menjëhershëm të bllokimit të padrejtë që “Acromax” ka bërë ndaj kanalit “Threedtos Production” në “Youtube” gjatë gjithë kësaj kohe;
Ndalimin e menjëhershëm të çdo përdorimi dhe shfrytëzimi mbi veprat e mia, për më shumë se 300 këngë, nga “Acromax” ose siç shumica i njohin, Aldor Nini, Anxhela Faber apo “Arkiva Shqip”;
- Në rast se këto shkelje vazhdojnë “Acromax” do të gjobitet deri në 250 mijë Euro, ose 6 muaj ndalim/arrest.
Siç e kam shprehur edhe në deklaratën e parë, kur kjo çështje ka filluar, nuk kam pasur (dhe s’kam për të pasur kurrë) qëllim të dëmtoj në asnjë lloj mënyre, kolegët, shumë prej të cilëve janë edhe miqtë e mi. Por, njëkohësisht shoh me shumë keqardhje sesa të papërgjegjshëm janë personat të cilët shfrytëzojnë veprat e mia dhe të kolegëve e miqve të mi, edhe pas këtij vendimi gjykate, duke vazhduar të kryejnë shkelje, duke thyer ligje dhe vendime të gjykatave kombëtare (pa harruar këtu edhe dy kallzime penale në hetim në Shqipëri dhe jashtë, për të njëjtët persona) dhe duke rrezikuar kështu fshirjen e kanalit “Arkiva Shqip”, prej të cilit dëmtohen vlerat që artistë, kolegë e miq, kanë ndërtuar në vite. Them shkelje edhe pse në shumë prej rasteve fjala më e saktë do të ishte vjedhje, sepse nuk mund të quhet ndryshe shfrytëzimi i punës së tjetrit pa i dhënë atij atë çka i takon.
Kolegë e miq, me shumë prej jush kam folur privatisht, pasi jeni interesuar, më keni pyetur, më keni përkrahur dhe për këtë u jam shumë mirënjohës, por në këtë rast dua publikisht të tërheq vëmendjen tuaj maksimale: mbroni veprat tuaja, mbroni muzikën tuaj, mbroni punën dhe rezultatet që keni arritur në vite, dhe mos lejoni në asnjë mënyrë t’ju shfrytëzojnë pa ju dhënë atë që ju takon, mos lejoni t’ju vjedhin, kushdo qofshin ata, mos heshtni kur doni të flisni, pavarësisht shantazheve, kërcënimeve, presioneve, sepse në fund të ditës e drejta nuk shtrembërohet dot.
Që në fillim të kësaj çështje kam besuar dhe shpresuar në mirëkuptimin e të gjithë artistëve, kolegëve, dhe miqve të mi, duke theksuar në çdo moment që kam kërkuar vetëm TË DREJTAT E MIA. Vendimi që u morr nga Gjykata e Këlnit është vetëm fillimi i një historie që do të jetë e lodhshme, por që në fund besoj se do të çojë në vend gabimet që të gjithë ne artistët, videoproduksionet, interpretuesit, tekstshkruesit, shtëpitë diskografike, televizionet, kemi bërë nga padituria, duke i besuar punën dhe djersën tonë, personave të gabuar. Ju them me bindje, që pavarësisht lodhjes që kjo çështje mbase do të sjellë, në fund do të jetë në të mirën e të gjithëve, dhe në favor të atyre që jetojnë me muzikën dhe për muzikën”./Newsbomb
