Një prej autorëve te dyshuar për trafikim të veprave të artit dhe kulturës në kuader te operacionit “Vlera” Shpetim Kalemi, është banor i komunitetit rom.
Kryeplaku i fshatit Drize Panajot Alushi kundërshton me forcë arrestimin e tij duke e konsideruar padrejtësi.
Ai i shet në treg me një çmim tepër të lirë ka pohuar Alushi, ndaj kërkojmë ndihmën e ekspertëve për t’i verifikuar pasi këto vepra kanë kaluar peëmes doganës greke e shqiptare dhe nuk janë ndaluar si objekte të paligjshme.
“Për mua është një padrejtësi që polica është futur në banesë pa asnjë urdhër. Të dëgjojë kryeministri dhe gjyqtarët e Fierit që na marrin në qafë kot për shkak të arsimit tonë, na sorollasin dhe na marrin nëpër këmbë.
Policia e Shtetit dhe Ministria e Drejtësisë duhet të marri masat për këtë shtresë. Shpëtim Kalemi ka dalë nuk e ka ndaluar dogana greke dhe ajo shqiptare, që i ka kaluar këto objekte me makinën e tij, i ka kaluar në skaner dhe ka paguar 260 euro, tani ato gjëra të vjetra që ne shesim me 500 lekë të vjetra në treg, bujrum të bllokojë të gjitha tregjet. Ai po nxjerr kafshatën e bukës, pastaj për personin tjetër nuk e shtron. Gjerat që janë kapur në shtëpinë e Shpëtim Kalemit, janë gjëra pa vlerë, të futet ekspertiza, ti verifikojnë. Ata janë gjëra që shiten me 1 mije lekë dhe 500 lekë. Të merren masa për atë, sepse ai është një njeri që mezi po ushqen kalajmajt, ka dhe dy jetime në shtëpi. Drejtori i Policisë së Fierit për mua nuk ka arsimin e duhur dhe duhet shkarkuar nga detyra. Në nuk e lejmë më kaq, do ta çojmë çështjen në gjykatën e Strasburgut. Nuk është hera e parë. Ka goditur dhe familjen time, por ne fituam dëmshpërblim nga gjykata e Strasburgut” tha ndër të tjera ai.
Deklarata e Drejtorit të Drejtorisë Vendore të Policisë Fier Drejtues i Parë Lorenc Panganika.
Përshëndetje,
Jam sot këtu, së bashku me prokurorin, për të bërë prezente rezultatet e operacionit policor të koduar “Vlera”, në kuadër të të cilit, pas një pune intensive hetimore me metoda proaktive, u bë i mundur arrestimi në flagrancë i 2 shtetasve që ushtronin veprimtari kriminale në fushën e trafikimit, kryesisht të veprave të artit dhe të kulturës.
Në vazhdën e operacioneve të njëpasnjëshme të zhvilluara nga strukturat e Drejtorisë Vendore të Policisë Fier, në bashkëpunim me Prokurorinë, për goditjen e fenomeneve kriminale, me qëllim sundimin e ligjit në territor, specialistët e Seksionit për Hetimin e Trafiqeve të Paligjshme të Drejtorisë Vendore të Policisë Fier, nëpërmjet inteligjencës policore, siguruan informacion për një rast të trafikimit të veprave të artit dhe kulturës, të cilin e referuan në Prokurori.
Bazuar në informacionin e referuar nga DVP Fier, Prokuroria e Juridiksionit të Përgjithshëm Fier regjistroi procedimin penal, i cili u ndoq për rreth 5 muaj, me metoda proaktive.
Si rezultat i provave të siguruara gjatë hetimit proaktiv, Seksioni për Hetimin e Trafiqeve të Paligjshme, në bashkëpunim me Drejtorinë e Forcës së Posaçme Operacionale në Policinë e Shtetit, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Fier, finalizuan operacionin policor të koduar “Vlera”.
Gjatë këtij operacioni, u ushtrua kontroll në dy banesa në qytetin e Fierit, konkretisht në banesat e shtetasve Sh. K. dhe P. P., ku shërbimet e Policisë gjetën dhe sekuestruan në cilësinë e provës materiale 107 vepra arti të dyshuara të trafikuara nga shteti grek, ndër të cilat ikona dhe piktura të autorëve grekë dhe rumunë, shpata dhe sende të tjera që dyshohet se i përkasin periudhës së antikitetit, një kokë mermeri e dyshuar e shekullit të dytë para lindjes së Krishtit, të gjitha këto me vlerë rreth 1.5 milionë euro, si dhe automjeti furgon me të cilin autorët transportonin veprat nga shtetit grek, në Shqipëri, municion luftarak, një sasi lënde e dyshuar narkotike cannabis sativa dhe një peshore elektronike.
Në vijim të operacionit u bë arrestimi në flagrancë i 2 autorëve të dyshuar të kësaj veprimtarie krimianale, shtetasve Sh. K., 51 vjeç dhe P. P., 57 vjeç, të dy banues në Fier, për veprat penale “Trafikimi i veprave të artit dhe kulturës”, “Trafikimi i armëve dhe municionit luftarak” dhe “Prodhimi dhe shitja e lëndëve narkotike”, të kryera në bashkëpunim.
Nga hetimi rezultoi se këta shtetas, në bashkëpunim me shtetas të tjerë ende të paidentifikuar, kanë trafikuar vepra arti nga shtetit grek, për t’i shitur në Shqipëri.
Vijon puna hetimore në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Fier, për zbardhjen e plotë të kësaj veprimtarie kriminale, identifikimin dhe vënien përpara përgjegjësisë ligjore të shtetasve të tjerë të përfshirë.
Gjithashtu do të bashkëpunohet me Policinë greke, për të zbardhur dhe dokumentuar këtë veprimtari kriminale dhe për të çuar përpara drejtësisë edhe shtetasit e tjerë të implikuar.
Strukturat e Drejtorisë Vendore të Policisë Fier janë angazhuar maksimalisht gjatë muajve të fundit, për goditjen e veprimtarive kriminale në të gjitha fushat. Në kuadër të megaoperacioneve kombëtare “Tempulli” dhe “Sundimi i ligjit” janë çuar përpara përgjegjësisë penale, 64 shtetas të implikuar në veprimtarinë kriminale të shpërndarjes së lëndëve narkotike në afërsi të shkollave, shtetas që qarkullonin me armë zjarri, të shpallur në kërkim për vepra të ndryshme penale etj. Gjithashtu, gjatë këtyre operacioneve janë sekuestruar armë, drogë dhe sende të tjera të kundërligjshme.
Njëkohësisht, strukturat e Policisë në qarkun Fier janë të angazhuara maksimalisht për zbatimin e masave të përcaktuara në Paketën për Sigurinë në shkolla, kopshte dhe çerdhe.
Të nderuar qytetarë, bashkëpunimi me ju është një shtyllë e fortë ku mbështetet puna jonë, ndaj përfitoj nga rasti t’ju falënderoj dhe t’ju ftoj sërish që të bashkëpunoni me ne, për denoncimin e çdo paligjshmërie. Dua t’ju siguroj se Drejtoria Vendore e Policisë Fier është në gatishmëri të plotë dhe ka marrë të gjitha masat që festat e fundvitit të mos veniten nga episode kriminale.
Duke ju falënderuar dhe juve përfaqësues të medias në qarkun Fier, për bashkëpunimin dhe për pasqyrimin e punës së Drejtorisë Vendore të Policisë Fier, në funksion të garantimit të rendit dhe të sigurisë, me qëllim krijimin e një ambienti sa më të sigurtë, ju uroj juve dhe të gjithë qytetarëve të qarkut Fier, gëzuar festat e fundvitit.
