“Në Shqipëri me pension italian të pataksuar. Aty ku një shtëpi buzë detit kushton 300 euro në muaj dhe mund të dalësh për darkë me 15 euro”. Me këtë titull gazeta e njohur italiane “Corriere del Mezzogiorno” i ka kushtuar vëmendje numrit në rritje të pensionistëve italianë që zgjedhin vendin tonë për të jetuar. Atë që i ka joshur të moshuarit italianë të lënë vendin e tyre e shpjegon Carmine Ianpietro, 75 vjeç, president i shoqatës së pensionistëve italianë në Shqipëri.
Janpietro prej më shumë se 10 vitesh ka vendosur që të stacionohet në Durrës bashkë me bashkëshorten e tij. Pas më shumë se 45 vitesh punë si mekanik në Puglia ai doli në pension, por vuri re se me paratë që merrte nuk mund të bënte një jetë për të qenë.
Kështu, në vitin 2015 ai për herë të parë, mori valixhet dhe kamperin e tij për një rrugëtim që po rezulton pa kthim drejt vendit të origjinës, duke u vendosur në Durrës.
“Këtu në Shqipëri jetohet shumë mirë me pensionin italian”, tregon Karmine, i cili shton se nuk ka ardhur këtu vetëm për pjesën e taksave dhe shpenzimeve, por edhe për qetësinë që ka gjetur dhe peizazhin e mrekullueshëm.
I moshuari italian tregon se ka marrë një shtëpi në buzë të detit për vetëm 300 euro në muaj dhe fton pensionistët e tjerë nga vendi i tij që ta konsiderojnë Shqipërinë si një vend për të kaluar kohë cilësore, ku nënvizon se “një ditë më parë kishte ngrënë darkë me miqtë e tij për vetëm 15 euro, gjë që nuk ndodh në asnjë vend tjetër të botës”.
“Arsyeja nuk është vetëm ekonomike pasi çeku i dërguar këtu mbetet bruto dhe nuk paguhen taksa, por edhe për shkak se ndihesh i sigurt. Nuk ka krime të vogla dhe në mbrëmje mund të ecësh i qetë pa frikë se mos ju grabitin”.
Iampetro thotë se numri i pensionistëve italianë në Shqipëri është rritur në mënyrë eksponenciale gjatë 3 viteve të fundit. “Para vitit 2021 ishim rreth 300. Sot, sipas të dhënave më të fundit nga regjistri i italianëve me banim jashtë vendit, në bazë të ligjit që u lejon shtetasve europianë që shpërngulen të jetojnë në Shqipëri për përjashtimin total nga taksat e pensioneve, kemi arritur në gati 3 mijë”.
Sipas tij, përjashtimi i pensionistëve nga taksat është arsyeja kryesore pse po vijnë kaq shumë pensionistë në Shqipëri.
“Në praktikë, nëse në Itali 1500 euro bruto bëhen 1150 neto, këtu 1500 euro mbeten të pastra. Dhe nuk vijnë vetëm ata me të ardhura të ulëta. Ka shumë pensionistë të pasur me mbi 50 mijë euro në vit”.
75-vjeçari tregon se edhe Shqipëria është prekur nga rritja e inflacionit, por megjithatë me çmimet në vend, pensionistët italianë mund të përballojnë një jetë më shumë se dinjitoze duke pasur edhe kujdes mjekësor.
