Policia, përmes një reagimi zyrtar, bën me dije se për shkak të grevës së planifikuar nga doganierët e palës greke, nesër (28 shkurt) nga ora 07:00 deri në orën 23:00, në PKK Kakavijë, PKK Qafë Bot – Sarandë dhe PKK Tre Urat – Përmet, do të pezullohet lëvizja e lirë e automjeteve.
Policia Kufitare e Janinës ka sqaruar se gjatë kësaj periudhe do të lejohen vetëm këmbësorët pa bagazhe dhe rastet emergjente shëndetësore (ambulancat).
Nisur nga kjo situatë, Policia Kufitare apelon për të gjithë qytetarët dhe drejtuesit e automjeteve që kanë planifikuar lëvizjen drejt Greqisë, të gjejnë alternativa të tjera për të udhëtuar dhe të shmangin grumbullimin në pikat kufitare të sipërpërmendura deri në një njoftim të dytë.
