Albin Kryeziu nga Malisheva është 26 vjeçari më fatlum i këtyre ditëve. Ai arriti që përmes një bilete llotarie që e bleu 5 euro, t’i fitojë jo më pak se 500 mijë euro.
Ngjarja ndodhi në Itali, teksa rasti u bë senzacion në mediat atje.
Albini në një ditë të zakonshme punë, bashkë edhe me vëllain dhe kolegët e tjerë ishte ndalur në dyqan për të marrë kafe dhe e provoi fatin, pa i shkuar mendja atij se mund të ishte pikërisht fituesi.
Ai u shpreh tejet i lumtur me këtë rast.
“Sinqerisht nuk e prisja. Sapo isha kthyer nga puna dhe po shkoja në shtëpi – e për ta humbur kohën në kafene bleva një tiketë gërvishtëse për të luajtur. Kur pashë shumën kërkova më shumë informacione në dyqan dhe u konfirmua se kisha fituar”, tha Kryeziu.
Kryeziu u shpreh se do të vazhdojë të punojë si zakonisht, por se këto para janë të mirëseardhura.
