Djali i ish guvernatorit të Bankës së Shqipërisë, Ardian Fullanit, Erik Fullani paraditen e sotme është shoqëruar në komisariat pasi në mjetin e tij u gjet një armë zjarri.
Sipas njoftimit të policisë mësohet se Fullani u ndalua nga policia në zonën e ish-Bllokut për t’u gjobitur për xhamat e errësuara të makinës së tij, mirëpo gjatë kontrollit në mjetin e tij policia gjeti edhe një armë zjarri.
29-vjeçari u shoqërua në Komisariatin numër 2 aty ku dhe rezultoi se arma të cilën e posedonte ishte me leje pasi Fullani punon si truprojë (bodyguard) në një firmë private.
Në vijim të veprimeve arma u dorëzua tek drejtuesi teknik i firmës.
Njoftimi i Policisë:
Sqarim i DVP Tiranë
Në lidhje me një lajm të publikuar në portale, sipas të cilit pretendohet se në zonën e ish-Bllokut, është kapur me armë zjarri pistoletë, shtetasi E. F., ju sqarojmë se:
Ditën e sotme, rreth orës 10:45, shërbimet e Policisë kanë ndaluar për kontroll, në zonën e ish-Bllokut, automjetin me xhama të errësuar, me drejtues shtetasin E. F., 29 vjeç. Këtij shtetasi i është vendosur masa administrative 20 000 lekë të rinj, për xhamat e errësuar të automjetit.
Gjatë kontrollit fizik, shërbimet e Policisë i kanë gjetur një armë zjarri pistoletë 29-vjeçarit dhe për këtë arsye ai është shoqëruar në Komisariat, për verifikime të mëtejshme.
Pas verifikimeve ka rezultuar se arma që ai mbante ishte me leje dhe në vijim të veprimeve u bë njoftimi dhe dorëzimi i armës te drejtuesi teknik i firmës, ku ai punon (bodyguard), sipas procedurave përkatëse.
