Një ngjarje e rëndë është shënuar orët e para në Korçë, ku janë konfliktuar jashtë ambienteve të një lokali disa persona. Bëhet me dije se sherri ka nisur për arsye banale dhe ka degraduar në përdorimin e armës së zjarrit dhe sendeve të forta.
Si pasojë ka mbetur i plagosur me armë zjarri në këmbë shtetasi Igli Hoti, 33 vjeç, ndërsa ka mbetur i plagosur me mjete të forta shtetasi Artan Qershori, të dy të lënduarit janë dërguar në spitalin e Traumës, ku ndodhen në kujdesin e mjekëve.
Si rezultat i veprimeve të para hetimore u bë i mundur identifikimi i autorëve të dyshuar të kësaj ngjarjeje dhe po punohet intensivisht për kapjen e tyre.
Njoftimi i policisë:
U konfliktuan për motive të dobëta, ku si pasojë e konfliktit mbeti i plagosur me armë zjarri një 33-vjeçar dhe u dëmtua me mjete të forta një shtetas tjetër, Policia identifikon menjëherë autorët e dyshuar të ngjarjes dhe vijon punën për kapjen e tyre.
Në orët e para të mëngjesit të sotëm, në lagjen nr. 3, Korçë, si pasojë e një konflikti për motive të dobëta, midis disa personave, të nisur më herët në ambientet e një lokali dhe më pas jashtë ambienteve të tij, ka mbetur i plagosur në këmbë me armë zjarri shtetasi I. H., 33 vjeç dhe i dëmtuar me mjete të forta shtetasi A. Q., të cilët u dërguan për mjekim në spitalin e Traumës Tiranë.
Shërbimet e Policisë, kanë shoqëruar në ambientin e Komisariatit dhe po marrin në pyetje, persona të cilët kanë dijeni për ngjarjen.
Si rezultat i veprimeve të para hetimore u bë i mundur identifikimi i autorëve të dyshuar të kësaj ngjarjeje dhe po punohet intensivisht për kapjen e tyre.
Grupi hetimor, në drejtimin e Prokurorisë, po punon për zbardhjen e plotë të rrethanave të ngjarjes.
