Katër ditë më parë plumbat e grupeve kriminale i morën jetën Mimozës Pajës në rrugën “Anastas Shundi” në lagjen e “Don Boskos.”
Persona ende të paidentifikuar derdhën breshërinë e plumbave në drejtim të loklait të Fation Muratit. Viktimë mbeti Mimoza Paja, 58 vjeç, ndërsa 5 persona të tjerë u plagosën. E plagosur nga ciflat e xhamave mbeti gjithashtu mbesa 10-vjeçare e viktimës.
Katër ditë pas tragjedisë, djali i Mimozës, Sajmiri ka treguar se në momentin që ka ndodhur vrasja, nëna e tij, Mimoza nuk ka qenë në orar pune te lokali i Fation Muratit, por kishte shkuar për të marrë një kafe, pasi nuk donte që të rrinte në shtëpi.
Në shtëpi ndodhej edhe një nga vajzat e Mimozës, e ëma e 10-vjeçares. Vajza thotë se nuk e kishte braktisur të bijën, por e mitura qëndronte me gjyshen sepse e donte shumë.
Paja shprehet se mbesa e tij e mitur e cila ndodhej në lokal në momentin e ngjarjes gëzon shëndet të plotë, edhe pse është ende e tronditur nga skena e rëndë që ka parë.
“Mbesa gëzon shëndet të plotë, ka pak ato pasojat e veta, është e tronditur nga ngjarja që ka parë, s’ia uroj kurrkujt ta shohi, ne vetë të rritur kur e dëgjojmë na trondit, jo më një fëmijë 10 vjeçe. Mbesa është me nënën dhe babain e saj. Për arsye, siç rri çdo fëmijë, ka qenë më e lidhur më shumë me nënën jo se të tjerët nuk janë, kjo ka qenë më e lidhur më e dashur”, thotë Paja.
Edhe pronari i shtëpisë ku Mimoza Paja qëndronte me qira tregon se viktima ishte shumë korrekte me pagesën. “Na rrinte shumë korrekt për punën e qirasë. Këto që thonë se ka kohë pa paguar qiranë është gënjeshtër”, ka treguar pronari i qirasë.
