Gjithçka shkrumb e hi është ajo se çfarë ka mbetur pas nga pallati që u përfshi nga flakët këtë mesditë në ish-Parkun e Autobusëve.
Siç duket edhe në pamje dëmet si pasojë e zjarrit të rënë janë të konsiderueshme. Fatmirësisht nuk pati viktima, ndërsa shkaqet e zjarrit ende nuk janë bërë të ditura.
Pas disa orë punë intensive, forcat zjarrfikëse arritën të shuanin zjarrin, puna e të cilëve hasi vështirësi pasi flakët u përhapën edhe në katet e tjera të pallatit.
Shkëlqim Goxhaj, kreu i Shërbimit Zjarrfikës të Tiranës, dha më herët detaje për zjarrin që ndodhi në zonën mes “Vasil Shantos” dhe “Ish-parkut të autobusëve”. Ai tha se materiali i fasadës ka favorizuar përhapjen e zjarrit.
Ndryshe nga njoftimi që dha Policia e Tiranës në informacionin paraprak, Goxhaj zbuloi se zjarri ka qenë në momentet e para në katin e dytë të pallatit dhe në tarracë.
Këtu, tha ai, ka nevojë për hetime pasi duhet të shihet nëse zjarri ka rënë fillimisht në katin e dytë dhe ka shkuar në tarracë apo ka qenë e kundërta.
