Policia e Vlorës ka zbardhur ngjarjen e ndodhur mëngjesin e sotëm në Selenicë, ku si pasojë e një shpërthimi, humbi jetën një-56-vjeçar.
Sipas provave të dokumentuara të Policisë 56-vjeçari Durmish Glluçaj ka humbur jetën nga shpërthimi i një bombole të një sobe gazi, e cila ndodhej në territorin e jashtëm të banesës së tij.
Policia e raportoi fillimisht si shpërthim nga një bombol gazi, por ngriti dyshime se mund të kishte qenë edhe lëndë plasëse ose granatë që ndodhej në oborrin e banesës së viktimës.
Për këtë arsye u ngrit një grup i posaçëm hetimor dhe me ekspertë xhenierë, të cilët dokumentuan me prova ligjore se rreth orës 06:15 të mëngjesit të sotëm ka shpërthyer një sobë e vogël me gaz territorin e jashtëm të banesës, ku për pasojë është dëmtuar 56-vjeçari i cili humbi jetën gjatë transportimit në spital.
Njoftimi i Policisë Vlorë
Zbardhet ngjarja e ndodhur mëngjesin e sotëm, në Selenicë, ku si pasojë e një shpërthimi, humbi jetën shtetasi D. G., 56 vjeç.
Dokumentohet me prova ligjore se në territorin e jashtëm të banesës së shtetasit D. G., ka shpëthyer bombola e një sobe të vogël me gaz.
Si rezultat i veprimeve të shpejta hetimore dhe procedurale, të kryera nga grupi i posaçëm hetimor i ngritur për këtë rast, dhe nga eskpertët xhenierë, në drejtimin e Prokurorisë së Vlorës, të cilët shkuan në vendngjarje menjëherë pas njoftimit, u bë e mundur zbardhja dhe dokumentimi me prova ligjore i ngjarjes së raportuar në sallën operative të DVP Vlorë, rreth orës 06:15 të mëngjesit të sotëm.
Nga hetimet rezulton se mëngjesin e sotëm, në territorin e jashtëm të banesës së shtetasit D. G., 56 vjeç, ka shpërthyer një sobë e vogël me gaz. Nga shpërthimi është dëmtuar shtetasi D. G., i cili si pasojë ka humbur jetën, gjatë transportimit në spital.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.
