Policia e Shtetit ka kryer një kontroll të lëshuar nga SPAK në të gjitha ambientet e kampit MEK në Manzë të Durrësit.
Dyshohej se aty ka eksponentë terroristë që kryejnë sulme kibernetike. Banorët janë konfrontuar fizikisht me policinë duke e konsideruar këtë një sulm. Sipas tyre një person i quajtur Ali Mostashari ka vdekur dhe shumë janë plagosur.
Pasi policia sekuestroi kompjutera dhe dokumente, banorët kanë dalë në protestë dhe kanë mbyllur dyert.
Opozita iraniane tha se pati dy viktima në kamp nga operacioni i policisë sot në Manëz, kur forcat speciale kërkuan të kryejnë kontrolle mbi një bazë sulmesh kibernetike të ngritur aty.
Por në nisje të operacionit, policia është përballur me refuzimin e iranianëve për të lejuar kontrollet ndaj ka hedhur gaz lotsjellës. Në lidhje me pretendimin e muxhahedinëve, policia tha se nuk ka të dhëna për të vdekur nga operacioni.
Reagimi i Ministrise se Brendshme
Operacioni i sotëm i Policisë së Shtetit në vendqëndrimin e MEK në Manëz të Durrësit është në zbatim të plotë të urdhrit të SPAK dhe vendimit të Gjykatës së Posaçme kundër Korrupsionit dhe Krimit të Organizuar.
Vendimi i Gjykatës është pasojë e veprimeve që bien haptazi ndesh me marrëveshjen dhe angazhimet e marra nga grupimi MEK prej vitit 2014 kur u vendosën në Shqipëri vetëm për qëllime humanitare. Fatkeqësisht ky grupim nuk iu është përmbajtur këtyre angazhimeve duke thyer marrëveshjen. Ndërhyrja e Policisë së Shtetit ka qënë konform ligjit dhe në zbatim korrekt të procedurave që kërkojnë operacione të tilla. Veprimet e Policisë së Shtetit për zbatimin e ligjit janë kryer si në çdo pjesë tjetër të territorit të Republikës së Shqipërisë.
Fatkeqësisht brenda kampit ka pasur rezistencë ndaj kryerjes së punës së Policisë së Shtetit, çka bie ndesh me kuadrin procedural të zbatimit të ligjit. Bazuar në të dhënat e Policisë së Shtetit, gjatë operacionit nuk ka pasur humbje jete dhe as të lënduar. Për çdo pretendim për humbje jete në spitalin e vendqëndrimit të tyre po bëhen të gjitha verifikimet proceduriale.
