Leonard Ademaj, vëllai i 30-vjeçarës Liridona Ademaj e cila u vra të mërkurën, tregoi para Gjykatës Themelore në Prishtinë se çfarë u kishe thënë pas krimit Naim Murseli, i cili dyshohet se porositi vrasjen. Ai tha se Murseli pas grabitjes së inskenuar, u tha familjarëve se kishte kërkuar ndihmë pasi i kishte marrë fëmijët nga makina dhe ishte larguar bashkë me ta, duke e lënë Liridonën brenda.
“Qysh dyert kur u çelën, grabitësi nuk shkon kah pasagjeri, shkon kah shoferi. Tha ka insistu në çantë. Çfarë insistimi, dritarja ka qenë e hapur veç pak. Liridona ish kanë në gjendje me jep gjithçka për fëmijët”, tha vëllai i saj.
Leonard Ademaj tregoi se si bashkëshorti i saj u përpoq t’ua fshihte skenarin e vërtetë të vrasjes.
“Tha kam dashtë me i shpëtu fëmijët, kam shku me kërku ndihmë. S’ma çelke kurrkush derën. Ka dalë një grua në ballkon, i kam thanë ‘thirre policinë’, më ka thënë s’di me i thirrë policinë. Tha kam shku në shitore, i kam thanë a mundet dikush me u kujdes për fëmijët deri t’i thirri policinë. Jo më tha ai unë i thirri policinë. Ti rri këtu se s’bën me shku. Po pse është kah të thotë ai, ti duhet me shku se e ke gru. Po shihet që e paska orkestru vetë”, tha Leonard Ademaj para gazetarëve.
Ai ka shpjeguar se është keqkuptuar deklarata e tyre për “dy ditë besë”, dhe shtoi se familja e tij drejtësinë e Liridonës ia ka lënë institucioneve të Kosovës.
“Ka qenë një keqkuptim. Ditën kur e kanë arrestuar Naimin, na kanë thirrë në telefon dhe na kanë thënë që është edhe dy ditë e pamja. Këtu është bërë një keqkuptim se kanë thënë dy ditë i kanë dhënë afat e s’di as çka është besë. Ajo s’është e vërtetë. Baba i ka thënë mbane të pamën edhe dy ditë qysh e keni pasë dhe asnjë send tjetër s’ka pasë. S’ka pasë dy e tri ditë besë. Na gjithçka ia lëmë drejtësisë, besojmë në drejtësi të Kosovës”– tha ai.
Sot u mbajt seanca e parë dëgjimore ndaj Naim Murselit, Granit Plavës dhe Kushtrim Kokallës, të cilët dyshohet se bashkëunuan për skenarin e vrasjes së Liridona Ademajt.
